Suliassamut immikkut ilinniarsimasoq

Inuit ilai suliffitsik aqqutigalugu inuit aningaasanoorutinut ajornartorsiornartumik inissisimasut imaluunniit aningaasanoortartunut qanigisaasut attaveqarfigilertarpaat. Amerlanernut aningaasanoortarneq aliikkutatut inooqatigiinnermilu sammisassaqartitsinertut aallartissimasarpoq kingorna aqunneqarsinnaajunnaarsimasoq, kisianni ilaannut aningaasanoorneq eqqissisimaarfiusassaaq ajornartorsiutinillu allanit qimaaffiulluni. 
Assersuutigalugu peqqinnissaqarfimmi sulisutut, ilinniartunut siunnersortitut, perorsaasutut imaluunniit isumaginninnermut siunnersortitut aningaasanoornermut uerineq pillugu ajornartorsiuteqartunik paasisaqaruit aningaasanoortarneq qanoq ingerlasarnersoq inummut pineqartumut apeqqutigalugu ikiornissaanut periarfissaqarputit. Siullermeernermi immaqa inuk pineqartoq ajornartorsiutip eqqartornissaanut piareersimassanngilaq aamma ajornartorsiuteqarnerup miserratiginera nalinginnaasuussaaq. 

Aningaasanoortarnermi nalorninartumik pissusilersornermut ilisarnaatit

Aningaasanoornermut uerinermi ilisarnaatit (ludomani) tarnikkut oqimaarsarnernit allanit immikkoortinnissai ajornakusoornarsinnaasarput. Ilaannikkut aningaasanoornermut uerineq tarnikkut atukkat allat ilutigalugit aamma pisinnaasarpoq.   

Taamatuttaaq aamma aningaasanoorutinik pinngitsuuisinnaannginneq timikkut, tarnikkut aamma pissusilersornikkut ersiuteqartitsilersinnaavoq. 

• Timikkut ilisarnaatit tassaasinnaapput ass uummatikkut kassutsitsineq, niaqorlunneq, eqqissiveqannginneq imaluunniit naakkut nukitigullu anniarneq.
• Tarnikkut ilisarnaatit ass tassaasinnaapput aallussisinnaannginneq, sinnarlunneq, isummanik allanngorarneq, siooralaneq, isumatsassimangaarneq imminornissamillu eqqarsaateqarneq.
• Pissusilersornikkut ilisarnaatit ass tassaasinnaapput qasseeriarluni isumaqatigiissutinik unioqqutitsineq, inooqatigiinnermit imminut mattunneq, pimoorussaqannginneq, puffajanerulerneq, eqqarsaqqaarani pinasuartarneq eqqarsaatikkullu allamiittarneq. 

Oqaloqatigiinneq artornartoq pillugu pitsaasunik siunnersorneqarit

AningaasanoortarneqUnitsiguk oqaloqatigiinneq artornartoq sioqqullugu siunnersorusussinnaavaatit, aamma inuk pineqartoq akisussaassuseqarnerusumik aqunneqartumillu aningaasanoortalernissaanut qanoq ikiorsinnaanerit siunnersuisarluni aamma sumi akeqanngitsumik katsorsarneqarnissamik qinnuteqarsinnaanersoq.