ROFUS

ROFUS tassaavoq Spillemyndighedenip Aningaasanoortartut Kajumissutsiminnik Mattunneqartut pillugit Nalunaarsuiffia. ROFUS-imi NemID atorlugu nammineq kajumissutsit najoqqutaralugu nalunaarsorsinnaavutit Danmarkimi aningaasanoortarnissamut utaqqiisaagallartuumik mattukkusukkuit imaluunniit mattutivikkusukkuit.

Eqqumaffigisassat

  • Nalunaarsornerit peqqissimissutigisinnaanngilat aamma atorunnaarsissinnaanngilat.
  • Internetsikkut aningaasaneerluni iluanaarniutinut ilisaqarnerit suulluunniit ROFUS-imut ilaapput. Aamma kasinot piviusut danskiusut tamarmik ROFUS-imut ilaapput
  • Nalunaarsuinikkut akuerissavat iserniarsariguit imaluunniit aningaasanoornermut konto nutaaq pilersinniarukku aningaasanoorutinik tuniniaasartut paasissutissat ilinnut tunngasut suliarisinnaagaat.
  • ROFUS-imi nalunaarsorneqarneq inummut namminermut tunngavoq, taamaattumillu imminuinnaq nalunaarsorsinnaavutit
  • Spillemyndigheden ROFUS-imi teknikikkut kukkunerit, taamaattoqarsimappat, sillimaffigeqquai, taamaalillunilu taamaattut akisussaaffigisinnaanagit

ROFUS-imut imminut nalunaarsorit

NemID atorlugu ROFUS-imut nalunaarsorit

NemID piginngiliuk?

NemID-eqanngikkuit ROFUS-imut nalunaarsorsinnaavutit Spillemyndighedenip attaveqarnermut allaffissiaa nr. 9-01 aqqutigalugu immersorlugulu nassiukkukku imaluunniit uunga:

Blanket 9-01

ROFUS - udelukkelse fra spil

Spillemyndigheden
Englandsgade 25, 6. sal
5000 Odense C

Spillemyndighedenip attaveqarnermut allaffissiaa

ROFUS qanoq ingerlasarpa? 

Suut ROFUS-imut ilaappat?

ROFUS-imut nalunaarsorsimaguit internetsikkut aningaasanoorutinit Danmarkimilu kasinonit piviusunit tamanit imminut mattussimassaatit. Tassunga atatillugu internetsikkut aningaasanoorutit tassaapput eqquiniutit aamma internetsikkut kasinoni aningaasanoorutit soorlu ass poker, roulette aamma maskiinanik eqquiffiusinnaasunik aningaasanoortarfittallit. 

Qanoq sivisutigisumik mattusimasinnaavunga? 

  • Nal. ak. 24
  • Qaammat 1, 3 imaluunniit 6
  • Mattunneqavinneq

Nal. akunnerini 24-ni aningaasanoornermit unikkallarnissannut imaluunniit qaammatini 1-imi, 3-ni imaluunniit 6-nni utaqqiisaagallartumik mattunneqarnissannur periarfissaqarputit. Aamma mattunneqavinnissap qinernissaanut periarfissaqarputit. Utaqqiisaagallartumik mattunneqarnerni piffissaq naagaangat nalunaaqutaq eqqorlugu nalunaarsorsimanerit nammineq ingerlaannartumik atorunnaartarpoq. Mattunneqavinnermi aatsaat siusinnerpaamik ukioq ataaseq qaangiuppat nalunaarsorsimanerit Spillemyndighedenimut peersinniarlugu noqqaassutigisinnaavat. NemID atorlugu www.rofus.nu-mut iserlutit taamaaliussaatit. Noqqaassut ullut minnerpaamik 7 amerlanerpaamillu ullut 30 qaangiuppata www.rofus.nu-mut iserlutit uppernarsarneqassaaq.   

ROFUS iserfigiuk

Inummut pineqartumuinnaq aamma tusarliuteqqusaanngitsoq

ROFUS-imi nalunaarsorneqarneq inummut namminermut tunngavoq, taamaattumillu imminuinnaq nalunaarsorsinnaavutit.
Spillemyndighedenip paasissutissat ilinnut tunngasut allanut tusarliunnagit suliarissavai. ROFUS-imut nalunaarsorsimaninnik takunnissinnaasutuat tassaapput aningaasanoorutinik tuniniaasartut kontoqarfigisatit. Kisiannili aningaasanoorutinik tuniniaasartut nalunaarsorsimanerit aatsaat takusinnaasarpaat mattusimanerpit nalaani iserniarsariguit imaluunniit kontomik pilersitsiniarsariguit. 

Pilerisaarut 

ROFUS-imut nalunaarsornerit ilutigalugu "Aningaasanoorutit pillugit pilerisaarutit naagga"-mut nalunaassaatit. Taamaalillutit ROFUS-imut nalunaarsorsimanerpit nalaani internetsikkut aningaasanoornermik ingerlatseqatigiiffinnit danskit aningaasanoorutinut pisinnaatitsissutaannik peqartunit pilerisaarutinik pisassanngilatit. 
Aningaasanoornermik ingerlatseqatigiiffiit pilerisaarutinik nassiussinissartik sioqqullugu ROFUS-imut nalunaarsorsimanerit takusinnaavaat. 

Aningaasanoorutit pillugit pilerisaarutini pineqarput oqarasuaatit normui, mailit adressii, najukkat adressii paasissutissallu allat aningaasanoornermik ingerlatseqatigiiffiit illit pillutit pigisai aqqutigalugit attaveqarfiginiarneq sunaluunniit niuernermut atasoq.
Pilerisaarutit adresseqartinnagit inoqutigiinnut agguaanneqartartut aamma internetsikkut pilerisaarutit tassunga ilaanngillat. 

Apeqqutigineqakkajukkat

Mattutivinneq qanoq isumaqarpa?

Mattunneqavinneq aallaavittut ataavartuusarpoq. Mattunneqavinnermi aatsaat siusinnerpaamik ukioq ataaseq qaangiuppat nalunaarsorneqarneq Spillemyndighedenimut peersinniarlugu noqqaassutigineqarsinnaavoq. Ataavartumik mattunneqavinnerup ingerlanerani aningaasanoornermut kontonnut iserniarsarigaluaruit aningaasanoornermut kontot matuneqassaaq. Aningaasanoornermut kontovit imarisai, taamaattoqarsimappat, aningaasanoornermut kontop matunerani ilinnut tunniunneqassapput. 
ROFUS-imut nalunaarsorsimanerit peersinniarlugu NemID atorlugu www.rofus.nu-mut isissaatit piiarneqarnissallu noqqaassutigalugu. Peerneqarnissamut noqqaassut ullut minnerpaamik 7 amerlanerpaamillu ullut 30 qaangiuppata www.rofus.nu-mut iserlutit uppernarsarneqassaaq.  

ROFUS iserfigiuk

Sooq ROFUS-imut nalunaarsortinniarlunga NemID atussavara?

ROFUS-imut nalunaarsornermi NemID atussavat isumannaanerpaamik pinissaq qularnaarniarlugu aamma nalunaarsornerit eqqunngitsut pinaveersaarniarlugit. Tamanna aamma isumaqarpoq illit kisivit ROFUS-imut nalunaarsorsinnaagavit.

NemID atornagu ROFUS-imut nalunaarsorneqarsinnaavunga?

Blanket 9-01

ROFUS - udelukkelse fra spil

NemID atorlugu ROFUS-imut nalunaarsornissannut periarfissaqeqanngikkuit attaveqarnermut allaffissiarput aqqutigalugu allaffissiaq nr. 9-01 immersorlugulu nassiussinnaavat imaluunniit uunga:

Spillemyndigheden
Englandsgade 25, 6. sal
5000 Odense C

ROFUS-imut nalunaarsorsimanera allanit paasineqannginnissaa tatigisinnaavara?

ROFUS nalunaarsuiffiuvoq Spillemyndighedenimi sulisunik ikittuinnarnik iserfigineqarsinnaasoq. Sulisut aatsaat paasissutissat ilinnut tunngasut suliarisinnaavaat tamanna sioqqullugu taamaaliornissaat akuerisimagukku. Sulisut nipangiussisussaatitaapput aamma inummut paasissutissanik suliarinnittarneq pillugu inatsimmi malittarisassat malittussaallugit. 

Aningaasanoorutinik tuniniaasartut aatsaat kontomik nutaamik pilersitsiniarsariguit imaluunniit aningaasanoornermut kontomut pilersinneqareersimasumut iserniarsariguit CPR-normut ROFUS-miittut misissorsinnaavaat.

ROFUS-imut nalunaarsornerit ilutigalugu aaqqissuussamut "Aningaasanoorutit pillugit pilerisaarutit naagga"-mut nalunaassaatit. Aningaasanoorutinik tuniniaasartut pilerisaarutinik nassiussinissartik sioqqullugu ROFUS-imut nalunaarsorsimanerit takusinnaavaat. 

"Aningaasanoorutit pillugit pilerisaarutit naagga" aningaasanoorutinik tuniniaasartunut aamma aningaasanoortartunut aaqqissuussaavoq pinngitsuugassaanngitsoq. 

Qanoq iliussaanga ROFUS-imut nalunaarsornera peqqissimissutigilerukku?

ROFUS-imut nalunaarsorneq unioqqutinneqarsinnaanngilaq nalunaarsornerullu peqqissimissutiginissaa imaluunniit atorunnaarsinneqarnissaa ajornarpoq. 

Qanoq iliussaanga ROFUS-imut nalunaarsornera peerusukkukku?

Utaqqiisaagallartumik imminut mattussimaguit piffissaq qinersimasaq naappat nalunaarsornerit nammineq ingerlaannartumik atorunnaassaaq. 

Ataavartumik mattunneqavinneq qinersimagukku taava aatsaat ROFUS-imut nalunaarsorsimanerit siusinnerpaamik ukioq ataaseq qaangiuppat Spillemyndighedenimut peersinniarlugu noqqaassutigisinnaavat. NemID atorlugu www.rofus.nu-mut iserlutit taamaaliussaatit. Noqqaassut ullut minnerpaamik 7 amerlanerpaamillu ullut 30 qaangiuppata www.rofus.nu-mut iserlutit uppernarsarneqassaaq.  

ROFUS iserfigiuk

ROFUS-imut nalunaarsorsimaguma aningaasanoornermut kontomit aningaasanik tigusisinnaavunga?

ROFUS-imut ataavartumik mattutivissimaguit aningaasanoorutinik tuniniaasartut, ataavartumik mattutivissimanerit paasigunikku, ingerlaannartumik aningaasanoornermut kontovit matuneqarnissaa isumagissavaat aningaasallu tassaniittut, taamaattoqarsimappat, ilinnut tunniutissallugit. Utaqqiisaagallartumik nalunaarsorsimaguit kontot utaqqiisaagallartumik atorunnaarsinneqassaaq. Aningaasanik tiguserusukkuit aningaasanoornermik ingerlatseqatigiiffik attaveqarfigissavat paasissutissanik sukumiinerusunik piniarlutit. 

Aningaasanoornermik ingerlatseqatigiiffimmit imaluunniit kasinomit piviusumit aalajangersimasumit mattunneq

Aningaasanoornermik ingerlatseqatigiiffimmit aalajangersimasumit ataatsimit ingerlatseqatigiiffiup nammineq nittartagaatigut imminut mattussinnaavutit. Imminut mattunneq nal.ak.-inik 24-nik, ullunik 30-nik sivisussuseqarsinnaavoq imaluunniit ataavartumik. Imminut ataavartumik mattutivinneq aningaasanoornermut kontovit matuneqarneranik kinguneqassaaq.

Aamma kasinomit piviusumit aalajangersimasumit ataatsimit imminut mattunnissat qinersinnaavaat. Tamanna pillugu kasinot saaffigalugit annertunerusumik paasiniaasinnaavutit.

ROFUS-imut nalunaarsorsimajunnaarama kisianni aningaasanoornermik ingerlatseqatigiiffimmut Danmarkimi pisinnaatitsissuteqartumut isersinnaanangalu kontomik pilersitsisinnaanngilanga. Qanoq iliussaanga?

Aningaasanoornermik ingerlatseqatigiiffik pineqartoq saaffigissavat teknikikkut kukkunerusinnaammat.

ROFUS-imi imminut mattunnissara kissaatiginngilara misissorusulluguli aningaasanoornernut atuinera uannut ajornartorsiutaasinnaanersoq. Qanoq iliorsinnaavunga?

Aningaasanoornermik ingerlatseqatigiiffiit nittartakkaminni "ludomanimut imminut misilitsinneq"-mut pisinnaaneq isumagisussaavaat. Aamma nammineerlutit misilitsinneq ROFUS.nu-mi nanisinnaavat.

ROFUS.nu

Akisussaassuseqartumik aningaasanoortarneq pillugu siunnersorneqarnissat pisariaqartikkukku Spillemyndighedenip ikiuisarfia AningaasanoortarneqUnitsiguk attaveqarfigisinnaavat oqarasuaatip normua +45 70 22 28 25 aqqutigalugu. Paasissutissat amerlanerusut www.stopspillet.dk-miipput.

ROFUS-imi teknikikkut kukkunerit

ROFUS-imi teknikikkut kukkunerit isasoornerillu Spillemyndighedenip akisussaaffiginngilai. ROFUS pissusissamisut ingerlanngitsoq paasissagaluarukku attaviginissatsinnut immersortagaq atorlugu mailimik nassikkutsigut qujamasuutigissavarput.

Spillemyndigheden attavigiuk

ROFUS-imut nalunaarsorsimavunga taamaattorli iserlungalu aningaasanoorsinnaavunga. Qanoq iliussaanga?

ROFUS-imut nalunaarsorsimanerpit nalaani aningaasanoorutinik tuniniaasartup aningaasanoorutinut nutaanut ilaalersinnaannginnerit akisussaaffigivaa. Taamaammat kukkuneq paaseriarukku erniinnaq aningaasanoorutinik tuniniaasartumut pineqartumut saaffiginninnissat pingaarpoq. Kukkunerit taamaattut pillugit Spillemyndigheden paasitinneqartarnissani assut soqutigisaraa, taama pisoqarnerit aningaasanoorutinik tuniniaasartunik nakkutilliinitsinnut immaqa ilanngussinnaagatsigit. Attaviginissatsinnut immersortagaq atorlugu attaveqarfigisinnaavatsigut. 

ROFUS-imut nalunaarsorsimavunga taamaattorli pilerisaarutinik nassinneqarlunga. Qanoq iliussaanga?

ROFUS-imut nalunaarsorsimanerpit nalaani aningaasanoorutinik tuniniaasartup aningaasanoorutit pillugit pilerisaarutinik nassinneqartannginnissat akisussaaffigivaa. Taamaammat kukkuneq paaseriarukku erniinnaq aningaasanoorutinik tuniniaasartumut pineqartumut saaffiginninnissat pingaarpoq. Kukkunerit taamaattut pillugit Spillemyndigheden paasitinneqartarnissani assut soqutigisaraa, taama pisoqarnerit aningaasanoorutinik tuniniaasartunik nakkutilliinitsinnut immaqa ilanngussinnaagatsigit. Attaviginissatsinnut immersortagaq atorlugu attaveqarfigisinnaavatsigut.

ROFUS-imut sianerit imaluunniit allagit

Apeqqutigisat akineqarsimanngippat

Apeqqutigisat akineqarsimanngippat Spillemyndighedenip sulisui ROFUS-imik suliaqartut attaviginissatsinnut immersortagaq isumannaatsoq aqqutigalugu toqqaannartumik allaffigisinnaavatit. (Immikkoortoq "ROFUS - aningaasanoorutinit mattunneqarneq" qineruk)

ROFUS-imut allagit

Aamma ugguuna toqqaannartumik sianerfigisinnaavatsigut +45 72 38 60 20

Oqarasuaat ammasarpoq ataasinngorneq - sisamanngorneq 5:00 - 11:00 aamma tallimanngorneq 5:00 - 10:00.