Gaming aamma gambling

Gambling

Gambling aningaasanik pinnanniarluni aningaasanoornertut nassuiarneqarpoq. Ass tassaasinnaapput sportsbetting (eqquiniutit), pinnanniutit kiliortortakkat, maskiinat aningaasanoortarfiit eqquiffiusinnaasut, internetsikkut aningaasanoortarfik, poker il.il. Aningaasanoorneq internetsikkut aamma piviusumik pisinnaavoq ass kioskimi, kasinomi imaluunniit halimi aningaasanoortarfimmi. Aningaasanik pinnanniarluni aningaasanoorutit amerlanersaannut ukiut killissarititaasut ukiut 18-iupput.  

Ileqquusumik maskiinani aningaasanoortarfinni eqquiffiusinnaasuni, rouletteni aamma pinnanniutini kiliortortakkani aningaasanik pinnanniarluni aningaasanoorutit tassaapput nalaatsornermik aningaasanik pinnanniarluni aningaasanoorutit. Tassa imaappoq pinnanneq imaluunniit pinnanngitsoorneq nalaatsorluinnartumik pisarput. Kisiannili aningaasanoorutit ima iluseqartinneqarput aningaasanoortumut isumaqartitsilerlutik isummakkut aaqqissuussillaqqittuugaanni qanoq inerneqarnissaa naatsorsorsinnaallugu taamalu pinnalluni. 

Aningaasanoorutinut nalaatsorluinnartumik pisartunut akerliupput ataqatigiissillugit aningaasanoorutinik taaneqartartut, taakkunani nalaatsorneq pisinnaassutsinut aamma ilisimasanut ataqatigiissinneqartarluni. Ataqatigiissillugit aningaasanoorutit ass tassaasinnaapput timersuutit pillugit eqquiniutit.  

Aningaasanoorutit tamarmik ima ilusilersugaapput qaratsami kalerrisaarut dopamin kaanngartittussanngorlugu, taassumalu qanoq iliornerup uteqqinnissaa kajungernarsisittarpaa. Aningaasanoornermi ajutoorsinnaanerup annertusiartornera ilutigalugu dopamin anginerusoq kaanngartinneqartarpoq. Aaliangersimasumik pisartumik annertuumillu ajutoorsinnaalluni aningaasanoortaraanni dopamin annertooq kaanngartinneqartarpoq. Tamatuma kinguneranik qaratsap dopaminimut malussarissusini appartillugu aaqqissavaa, taamaalillunilu sunik allanik nuannaaruteqarsinnaaneq ajornarnerulersinnaalluni. Tamatuma saniatigut ilisimatuutut misissuinerit takutissimavaat inuit aningaasanoortarnermik ajornartorsiuteqartut aningaasanoortarnermik ajornartorsiuteqanngitsunut naleqqiullugit aningaasanik pinnanniarluni aningaasanoorutit pillugit pilerisaarutinit annerusumik sunnerneqartartut. 

Gaming 

Gaming computerikkut konsolilu tunngavigalugu pinnguaatinut assigiinngitsunut taaguutaavoq ataatsimoortoq. Gamingimi siunertaq pingaarneq tassaavoq suilaaqut. Ukiuni kingulliunerusuni computerikkut pinnguaatit internetsikkut ingerlanneqartut atorneri amerleriapiloorsimapput, pinnguartoq nunarsuarmit tamarmit pinnguarfiusumi pinnguaqatigiinnut ilanngulluni peqataalluni.   

Computerikkut pinnguaatit ima ilusilersugaapput pinnguartup pinnguarnikkut pisinnaasani ineriartortissinnaallugit, pinnguartullu pikkorissiartornera ilutigalugu nalunassusia annertusiartortarluni. Computerikkut pinnguaatit erseqqissunik angusassaqartitsisarput, aqutsinerup qaffakkiartuaarnera erniinnarlu utimut tunniussisarlutik. Pinnguaatit "teqeqqut takorluugaannaat"-nik ilusilersugaapput qaratsap akissarsisitsisarneranik aallartitsisartunik. Tassaasinnaapput nipit, piffissamik eqquinerit, nipilersuutit tunulequtaasut sukumeeqqinnaamik ineriartortinneqarsimallutillu aaqqissuunneqarsimasut dopamin qaratsamiittoq kaanngartinniarlugu. Tamatumani akornutaasinnaasoq tassaavoq qaratsap dopamin annertuallaartoq kaanngartikkaa piffissallu ingerlanerani qaratsap dopaminimut malussarissusia ajornerulersillugu. Tamatuma pinnguaammik pinngitsuuisinnaannginneq kingunerisinnaavaa ilutigalugulu suut allat nuannaarutigisinnaanerat ajornarnerulerluni. Computerikkut pinnguaatit ajornartorsiutinngortarput inuunermi sunut allanut akornutinngoraangata.  

Gaming aamma gambling ataatsimoortillugit  

Gaming immikkoortuuvoq ineriartupiloortoq, aamma gaming aamma gambling taamaallutik ataqatigiissinneqarnerulersimallutik paasilertoruminaassinnaallutillu, aningaasanik pinnanniarluni aningaasanoorutit (gambling) immikkoortuisa ilai computerikkut pinnguaatinut (gaming) ilanngutivitsinneqartarmata. Tassunga atatillugu ingasammik meeqqat inuusuttullu navianartumiipput, taakkuugajuttarmata gamertartut.  
Naak gambling aamma gaming nalinginnaasumik pinnguariaatsitut marluttut assigiinngitsutut isigineqartaraluartut immikkoorutaat aanngaraluttuinnarpoq. Danmarkimi gamblissagaanni inatsisikkut akuersissutigineqarsimavoq 18-inik ukioqartariaqartutit kisiannili computerikkut pinnguaatini pinnguartut qassinik ukioqarnissaannut innersuussutit pillugit taamaallaat najoqqutassiortoqarsimalluni.  

Gamingimi aningaasanik pinnanniarluni aningaasanoorutit immikkoortui

Pisineq tunisinerlu

Gamingimik nioqquteqartarnermi maanna gamblingip immikkoortuinik annermik "lootboxes"-inut aamma "skins"-inut taaneqartartunut attuumassuteqartunik peqarpoq. Lootbox tassaavoq computerikkut pinnguaatini assigiinngitsuni illerfik illernartuusiviusaq skinsinik imaqarsinnaasoq, tassaakkajuttut ass sakkumut pinnersaatit. Pinnguartup skinsiutini tunisinnaavai taamaalillunilu iluanaarutigalugit.

Gaming aamma gambling

Lootboxesinik atuisarnerit ilai gamblingimut assingusarput, tassa illerfiit illernartuusiviit pisiarineqartaramik skinsinillu pinnassinnaalluni. T.i. gamblingimisut immikkoortoqarput ; nalaatsorneq aamma pinnataqarsinnaaneq. Aamma skinsiutit computerikkut pinnguaatip avataani peqataasut pingajuata nittartagaanik taaneqartartumi danskit pisinnaatitsissutaannik peqanngitsumi roulettemi gamblerneqarsinnaapput. Tamanna skinsbettingimik taaneqartarpoq gamblingivittullu ingerlasarluni.  

Lootboxes aamma skinbetting pillugit atuagaqarnerugit

Gambling pinngitsuuisinnaannginnerlu

Gamblingip immikkoortui computerikkut pinnguaatiniittut pinnguartumi pinngitsuuisinnaariaaseq ileqquusumik gamblingertarnermiittartup assinga pilersissinnaavaa; ataasiaqqilaarusunneq, annaasat uterteqqinnissaannut neriuuteqarneq aamma iluatsitsinngittaqattaarneq unitsinneqarsinnaasoq pinnguarneq/aningaasanoorneq nanginneqaannarpat. Taamaattumik takuneqarsinnaavoq meeqqat inuusuttullu pinnguaatinut /aningaasanoorutinut aningaasarpassuit atorsinnaagaat naggataatigullu angajoqqaat akuersiseqqaarnagit kreditkortii atortalersinnaallugit.